Umabante ang Far Eastern University (FEU) Tamaraws sa semi finals matapos patumbahin ang University of the Philippines (UP) Fighting Maroons, 72-63, sa kanilang quarterfinals match up sa 2022 Filoil EcoOil Preseason Cup na ginanap sa Filoil EcoOil Centre sa San Juan City noong Agosto 23.

Palitan ang ipinakitang opensa at depensa ng Tamaraws at ng kasalukuyang kampeon ng University Athletic Association of the Philippines (UAAP) men’s basketball tournament sa unang bahagi ng laro. 

Agad namang nakahabol ang UP cagers upang bumuo ng 10 puntos na kalamangan sa ikatlong canto, 35-45.

Sa pagpasok ng ikaapat na quarter, mas gumanda ang depensang ipinamalas ng green-and-gold squad at binawi ang point advantage para masungkit ang pagkapanalo.

Sa isang panayam, ibinahagi ni FEU Head Coach Olsen Racela na malaking bagay din na wala ang ilang bigating manlalaro ng Fighting Maroons na sina Carl Tamayo, Zavier Lucero, at Henry Galinato na nangunguna para sa koponan ng Katipunan.

“Malaking bagay sa kanila ‘yung tatlong bigs [Tamayo, Lucero at Galinato] na ‘yun eh… A lot of things we need to work on, but of course we’re very happy with the way our team competed (Marami kaming kailangang pagsikapan, ngunit siyempre masaya kami sa paraan kung paano lumaro),” ani Coach Racela.

Tinanghal si Bryan Sajonia na top scorer ng Morayta-based squad sa ginawa nitong 16 puntos. 

Tinulungan din si Sajonia ni FEU team captain LJay Gonzales na lumikha ng 13 puntos, 10 rebounds, at tatlong assists. Samantala, nagtala din si Royce Alforque ng 13 puntos.

Sa isang panayam, sinabi ni Gonzales na ang kanilang depensa kontra UP ang isa sa mga naging dahilan sa pagkamit ng huling semis ticket sa liga.

“Siguro para sa akin nagsimula ‘yun sa defense (depensa) namin. Kasi ‘yun ang palaging sinasabi ng coaches namin na depensahan hanggang sa dulo kaya siguro ‘yun ang kinalabasan ng game,” ani Gonzales.

Nagpakitang gilas din ang bagong reinforcement na si Patrick Tchuente sa kanyang preseason debut at nagtala ng 11 puntos at walong boards sa kabuuan ng laro.

Muling kakalabanin ng FEU Tamaraws ang De La Salle University (DLSU) Green Archers para sa semi finals ng liga sa Agosto 25 na gaganapin sa parehong venue.

-Ma. Katlene R. Angcanan

(Litrato ni Alyssa Andrea Quiogue/FEU Advocate)