Ni Aimerose C. Atienza

Matagumpay na nakapasok sa finals ang Far Eastern University (FEU) Tamaraws matapos sungkitin ang panalo laban sa De La Salle University (DLSU) Green Archers, 71-67, sa kanilang overtime semi finals game sa 2022 Filoil EcoOil Preseason Cup na ginanap sa Filoil EcoOil Centre sa San Juan City, Agosto 25.

Matatandaang natamo ng Tamaraws ang kanilang unang pagkatalo sa opening game kontra DLSU ng Group B eliminations, 49-65, sa nasabing liga noong Hulyo 23.

Sa unang tatlong quarters ng laro, nakuha ng Archers ang kalamangan, ngunit hindi tuluyang nakalayo dahil sa ipinamalas na opensa ng Morayta-dribblers na nagresulta sa overtime match sa huling canto, 61-61

Nakamit ng FEU ang huling tiket patungong finals sa tulong ng apat na puntos na ginawa ni Xyrus Torres sa huling 1:06 marka ng laban.

Sa isang panayam, ibinahagi ni FEU Head Coach Olsen Racela na bagaman nakadidikit ang koponan sa kabuuan ng laban, may mga bagay pa rin silang kailangang ayusin tulad ng kanilang turnovers na umabot sa 21 sa laban kontra DLSU.

“All throughout the game, we were just staying close although may mga turnovers kami during the game na kailangan namin iimprove (Sa kabuuan ng laro, nakakadikit lang kami kahit na may mga turnovers kami sa laro na kailangan pa namin ayusin),” ani Coach Racela.

Pinangunahan ni Patrick Tchuente ang koponan ng Morayta nang makapagtala ito ng 19 na puntos, walong boards, at tatlong blocks na nagresulta sa 75% shooting efficiency.

Malaking tulong din ang binigay ng dalawang veteran guards ng FEU na sina Team Captain LJay Gonzales na may 13 puntos, siyam na rebounds, at siyam na assists at Royce Alforque na gumawa ng 10 puntos, tatlong boards, at tatlong dimes para sa Tamaraws.

Makakaharap ng FEU Tamaraws ang National University (NU) Bulldogs at susubukang sungkitin ang kampeonato ng preseason cup sa parehong venue sa Agosto 27.

(Litrato ni Janice Aina Herrera/FEU Advocate)